អន្តរជាតិ៖ អង្គការសុខភាពពិភពលោក (The World Health Organization) មានការព្រួយបារម្ភអំពីការកើនឡើងវិញនៃការរាលដាលវីរុសកូវីដ-១៩សាជាថ្មីនៅក្នុងប្រទេសចិន ហើយ WHO ក៏បាននិងកំពុងគាំទ្ររដ្ឋាភិបាលក្នុងការផ្តោតលើកិច្ចខិតខំប្រឹងប្រែងរបស់ខ្លួន ទៅលើការចាក់វ៉ាក់សាំងដល់ក្រុមមនុស្សដែលមានហានិភ័យខ្ពស់បំផុតនៅទូទាំងប្រទេស។ នេះបើតាមការបញ្ជាក់របស់អង្គការសុខភាពពិភពលោកនៅថ្ងៃពុធម្សិលមិញនេះ។

ថ្មីៗនេះ មានការផ្ទុះឡើងជាថ្មីនៃការឆ្លងរាលដាលនៃវីរុសកូវីដ-១៩ឡើងវិញនៅក្នុងប្រទេសមហាអំណាចសេដ្ឋកិច្ចលំដាប់ទី២របស់ពិភពលោកនេះ ខណៈក្រុមអ្នកសិក្សាស្រាវជ្រាវមួយបានព្រមានពីការផ្ទុះឡើងទ្រង់ទ្រាយធំនៃវីរុសកូវីដ-១៩ក្នុងប្រទេសចិន ដែលអាចមានលទ្ធភាពផ្តាច់ជីវិតមនុស្សលើសពី ១លាននាក់នាឆ្នាំក្រោយ។ 

លោក Tedros Adhanom Ghebreyesus អគ្គនាយកអង្គការសុខភាពពិភពលោកបានប្រាប់មកកាន់អ្នកសារព័ត៌មានថា អង្គការ (WHO) មាន​ការ​ព្រួយ​បារម្ភ​យ៉ាង​ខ្លាំង​ចំពោះ​ស្ថានការណ៍​វិវត្តន៍​ថ្មីនៅ​ប្រទេស​ចិន ជាមួយនឹងការកើនឡើងយ៉ាងខ្លាំងនៃតួលេខឆ្លងថ្មីនៃវីរុសកូវីដ-១៩។ លោក Tedros បានបន្ថែមថា WHO ត្រូវការទិន្នន័យ និងតួរលេខជាក់ស្តែងលម្អិតបន្ថែមទៀតអំពីការវិវត្ថន៍នៃស្ថានការណ៍ជាក់លាក់ក្នុងប្រទេសចិនអំពីវីរុសកូវីដ-១៩ ដើម្បីងាយស្រួលឆ្លើយតបទៅនឹងតម្រូវការដែលចាំបាច់ក្នុងស្ថានភាពនេះ។

គួរ​ប​ញ្ជាក់ថា ការថ្លែងរបស់ថ្នាក់ដឹកនាំនៃស្ថាប័នអង្គការសហប្រជាជាតិខាងលើនេះ ធ្វើឡើងស្របពេលដែលរដ្ឋាភិបាលអាល្លឺម៉ង់បានបញ្ជាក់ថា ខ្លួនបានបញ្ជូនវ៉ាក់សាំង BioNTech COVID-19 លើកដំបូងទៅកាន់ចិន ក្នុងការផ្តល់ជូនការចាក់វ៉ាក់សាំងដល់ជនជាតិអាល្លឺម៉ង់ដែលកំពុងស្ថិតនៅប្រទេសចិន៕